Ўзбекистоннинг Мўғулистондаги элчихонаси ташаббуси билан бир қатор шартнома ва битимлар тузилди, деб ёзади UzDaily.
Ўзбекистоннинг Мўғулистондаги қайта тайинланган элчиси Бахтиёр Саидовнинг Мўғулистон ҳукумати билан учрашуви чоғида ҳамкорлик масалалари муҳокама қилинди. Мўғулистоннинг йирик компаниялари вакиллари билан учрашув ўтказилди. Музокаралар чоғида компаниялар вакиллари Ўзбекистонга таклиф этилган эди. Натижада бир ой ўтмай, Мўғулистоннинг «Номин Холдинг» йирик компанияси делегацияси Ўзбекистонга ташриф буюрди.
Ташриф чоғида делегация мамлакатнинг турли ҳудудларидаги кўплаб саноат корхоналарида бўлди. «Ўзавтосаноат» компанияси раҳбари Умид Салимов билан учрашувда шартлар муҳокама қилинди ва ўзбек автомобилларини Мўғулистонга етказиб бериш ҳақида битим имзоланди.
«Ўзбекозиқовқатхолдинг» вакиллари билан учрашувда мўғулистонлик шерикларга Ўзбекистоннинг биологик тоза органик маҳсулотлари тақдим этилди. Якунда «Ўзагроэкспорт» ва «Номин Холдинг» ўртасида Ўзбекистондан Мўғулистонга қуруқ мевалар, мева ва сабзавотларни экспорт қилиш бўйича 10 миллион долларлик шартномалар тузилди.
Изоҳ (0)