9 май муносабати билан 17 апрелдан 9 майга қадар «Ғалаба — барча учун битта» номи остида ноёб автомобиллар марафони уюштирилади. Россиянинг Ханти-Мансийск мухтор округи тузилмалари томонидан ташкил этилаётган тадбир Нижневартовск шаҳридан бошланиб, Самарқандда тугайди.
Тадбирда 18 нафар россиялик автомобиль ишқибози иштирок этади. Улар 1930–1943 йилларда ишлаб чиқарилган еттита ГАЗ М-20 «Победа» машиналарини бошқариб боради.
Тадбирда, шунингдек, журналистлар, ташкилотчилар, блогерлар, видеооператорлар қатнашади.
Авторалли Россия, Қозоғистон, Қирғизистон ва Ўзбекистон ҳудудидан ўтади. Йўналиш, жумладан, Ўзбекистоннинг Тошкент ва Самарқанд шаҳарларини қамраб олади.
Автоюриш иштирокчиларининг Чимкент орқали Ўзбекистонга кириши 28 апрель кунига мўлжалланган. Улар 1 май куни Самарқанддан Қозоғистонга қайтиб кетади.
Республикада бўлганида видео ва фотосъёмка ишларини олиб боради, уруш фахрийлари, Ўзбекистон ёшлари билан учрашади, шунингдек, Иккинчи жаҳон урушига бағишланган мемориаллар пойига гуллар қўяди.
Изоҳ (0)