Суперлиганинг 7-туридан бошлаб ҳар турда стадионларга ташриф буюрган энг фаол мухлисларга ЎФА томонидан бепул тўплар тақдим қилинади. Бу ҳақда ташкилот расмий сайтида хабар берилди.
Ўзбекистон футбол ассоциацияси ҳамда Профессионал футбол лигаси томонидан Ўзбекистонда футболни ривожлантириш, миллий чемпионат савиясини ошириб, стадионларга мухлисларни янада кўпроқ жалб қилиш мақсадида бир қатор чора-тадбирлар амалга оширилмоқда.
Жумладан, миллий чемпионат баҳсларини томоша қилиш учун стадионларга ташриф буюраётган мухлисларни хурсанд қилиш, айниқса, ёш болакайларда футболга бўлган меҳрни янада ошириш мақсадида, турли акциялар, тадбирлар ўтказиш режалаштирилган. Ушбу мақсадда стадионларда турли аттракционлар, овқатланиш шохобчалари, футболга оид эсдалик совғалар, спорт либослари сотиладиган дўконлар барпо қилинади.
Шунингдек, Суперлиганинг 7-туридан бошлаб ҳар турда учрашувларни томоша қилиш учун стадионга келган энг фаол мухлисларга Ўзбекистон футбол ассоциацияси томонидан Суперлига клублари футболчиларининг имзоси туширилган бепул тўплар тақдим қилиб борилади. Мухлислар ушбу тўпларни клубнинг машҳур футболчиларидан қабул қилиб олиб, улар билан бирга суратга тушиш имкониятига ҳам эга бўлади, дейилади хабарда.
Изоҳ (0)