Президент Шавкат Мирзиёев Наманганнинг «Навбаҳор» жамоаси мухлисларига 22 мингта футболка совға қилди

Бугун, 16 апрель санасида Наманган шаҳридаги «Марказий» ўйингоҳи анжуманлар залида йиғилиш бўлиб ўтди, деб хабар беради ЎФА матбуот хизмати.

Президент Шавкат Мирзиёев томонидан «Навбаҳор» жамоасининг фидойи, ашаддий футбол мухлисларига футболга бўлган меҳрлари сабаб совға сифатида 22 минг дона футболка тақдим этилди.

20 апрель куни соат 18:00 да Наманган шаҳридаги «Марказий» ўйингоҳда футбол бўйича Ўзбекистон Суперлигаси 7-туридан ўрин олган «Навбаҳор» — «Бунёдкор» жамоалари ўртасида бўлиб ўтадиган учрашувга ташриф буюрган футбол мухлисларига мазкур футболкалар бепул тарқатилади.

Йиғилишда «Навбаҳор» клубига раҳбариятига тегишли ташкилий масала ҳам кўрилган. Шу вақтга қадар «Навбаҳор» директори лавозимида фаолият юритган Акрамжон Дедабаев ўрнига кўпчиликка «Бунёдкор»даги фаолияти билан таниш Бахтиёр Бобоев тайинланган.