Самарқанд вилоят мусиқали драма театри Туркия давлатига гастрол сафарини уюштиради. Бу ҳақда Маданият вазирлиги матбуот хизмати маълум қилди.
Самарқанд театрида 2017 йилда саҳналаштирилган турк драматурги Тунжар Жужанўғлининг «Кўчки» спектакли муваффақият билан қўйилиб, томошабинлар эътирофига сазовор бўлиб келмоқда. 2017 йил ноябрь ойида театрнинг Тошкентга ижодий сафарида асар муаллифи Тунжар Жужанўғлининг ўзи ҳам ташриф буюриб, спектаклни кўриб, унга юқори баҳо берган эди.
«Кўчки» асари дунёнинг 40 дан ортиқ мамлакатлар театрларида саҳналаштирилиб, муваффақиятли ўйналиб келинмоқда.
2018 йил 23 февраль куни Туркия давлати Маданият ва туризм вазирлиги театрлар бошқармаси томонидан Самарқанд вилоят мусиқали драма театри номига юборилган хатда, «Кўчки» спектакли 2018 йил 20—30 апрель кунлари Туркия давлатининг Коня шаҳрида ўтказиладиган «Минг нафас бир овоз» туркий тилларда саҳналаштирилган спектаклларнинг XI Халқаро фестивалига таклиф этилганлиги маълум қилинган эди.
Шу муносабат билан, Самарқанд вилоят мусиқали драма театри жорий йилнинг 20—30 апрель кунлари Туркия давлатининг Конья шаҳрида бўлиб ўтадиган фестивалда иштирок этишга ҳозирлик кўрмоқда.
Спектаклдаги асосий ролларни театрнинг етук актёрлари Ўзбекистонда хизмат кўрсатган артистлар Бахтиёр Рахимов, Бахрулло Рахимов, Гулбаҳор Мамедова, Меҳри Ҳакимова, Солижон Ҳакимовлар билан бир қаторда, умидли ёш актёрлар Жамшид Муродов, Шохсанам Облоқулова, Сарвиноз Саитовалар маҳорат билан ижро этиб келмоқдалар.
Изоҳ (0)