2 апрель куни «Дарё» «Қўқон театри актёрлари Президент топшириғи билан қурилган уйга кўчиб киришни нега истамаяпти?» номи билан журналист суриштируви эълон қилганди. Унда Қўқон мусиқали драма театри актёрлари Президент топшириғи билан шаҳарда театр, санъат ва маданият ходимлари учун қурилган уйларни банк томонидан белгиланган нарх, бошланғич бадал ва ойлик тўловлар қимматлиги сабаб сотиб ололмаётганига ойдинлик киритилган эди.
Мақола эълон қилинганидан уч кун ўтиб, театр ходимлари муаммо шаҳар ҳокимлиги ва «Ўзсаноатқурилишбанк»нинг Қўқон филиали мутасаддилари томонидан зудлик билан ҳал этилиб, ипотека кредити муддати 20 йилга узайтирилганини маълум қилди.
Бу хабарга аниқлик киритиш мақсдида «Дарё» мухбири «Ўзсаноатқурилишбанк»нинг Қўқон филиали билан боғланди.
«Ҳақиқатан ҳам, ижодкорлар учун қурилган уйларнинг ипотека кредити муддати 10 йилдан 20 йилга узайтирилди. Ҳозир кредитлар ажратишни бошладик, театр ходимлари келиб тўлов қилишяпти. Кредит муддати узайтирилганидан қурувчилар ҳам хурсанд бўлди», – дейди «Ўзсаноатқурилишбанк»нинг Қўқон филиали намунавий уй-жойларни кредитлаш ва қурилишини назорат қилиш сектори мудири Муҳаммадсолиҳ Ҳакимов.
Театр раҳбари Ҳусанжон Эшматов ҳам бу маълумотни тасдиқлаб, 5 апрель куни уч нафар ходим бошланғич тўловни амалга оширганини айтди. Театрнинг барча ходимларига бу маълумот етказилган. Уларнинг бошқа муаммоларини ҳам ўрганиш ва ҳал этиш бўйича иш олиб борилмоқда.
Изоҳ (0)