Германиянинг Friedensdorf International халқаро ташкилоти тиббиёт мутахассислари вилоят болалар кўп тармоқли шифохонасида Фарғона ва Наманган вилоятларидан 93 нафар бемор болани тиббий кўрикдан ўтказди. Бу ҳақда «Дарё» мухбири Азиз Эрматов хабар берди.
«Ташкилотимиз ҳар йили Ўзбекистондан 35–40 нафар болага Германияда даволаниш имкониятини беради. Бугунги тиббий кўрикдан сўнг Ўзбекистонда даволашнинг имкони бўлмаган туғма нуқсонли ва куйиш асорати бор 4 нафар бола Германия клиникаларига жўнатилади», — дейди халқаро ташкилот вакили Натали Витте.
Соғлиқни сақлаш вазирлиги ва «Соғлом авлод учун» халқаро хайрия фонди билан ҳамкорликда ўтказилган кўрик давомида терида куйишдан қолган асоратлари бўлган, таянч ҳаракат тизимида муаммолари бор, урологик хасталиклар билан оғриган болалар мутахассислар қабулида бўлди. Улар германиялик шифокорлардан зарур тавсия ва маслаҳатлар олди. Бир гуруҳ бемор болаларга Ўзбекистондаги ихтисослашган тиббий муассасаларда даволаниш учун йўлланма ва бепул дори-дармонлар берилди.
— Friedensdorf International халқаро ташкилоти билан 16 йилдан буён ҳамкорлик қиламиз. Улар лаб, танглай ва ҳаракат-таянч аъзоларида нуқсони бор болаларнинг даволанишига ҳам ҳомийлик қилади. Бу ташкилот ёрдами билан юрагида нуқсони бор уч бола Ҳиндистонда операция қилинди,» — дейди «Соғлом авлод учун» фонди Фарғона вилоят филиали раҳбари Нурулло Худойберганов.
Изоҳ (0)