General Motors компаниясининг Жанубий Кореядаги ваколатхонасининг кабинетига ишчилар ҳужум қилди. Хона ичидаги камералардан олинган видеоёзув YouTube’га жойланди, деб ёзади Аuto Mail.Ru. Шу тариқа, касаба уюшмаси аъзолари компания сиёсатига қарши норозилигини билдиришга қарор қилди.
Кадрларда бир неча киши кабинетга бостириб кириб, жиҳозларни у ёқдан-бу ёққа суриб, уларни синдираётгани, шунингдек, турли буюмларни ерга отиб-сочаётганини кўриш мумкин. Видео охирида эса «исёнчилар гуруҳи» кабинетдан ўз раҳбарларига тегишли столни олиб чиқиб кетган.
Нашр эслатишича, ўтган йилдан буён Жанубий Кореядаги GM компаниясининг ишлари яхши юришмаяпти. Аввалроқ ишлаб чиқарувчи мамлакатдаги заводларидан бирини ёпиш, шунингдек, 5000 га яқин ходимини қисқартириш режалари ҳақида эълон қилган эди. Бундан ташқари, ишчилар уларга қонуний мукофот пуллари тўланишини талаб қилмоқда, компанияда эса бунинг учун пул йўқ.
Таъкидланишича, ўз акцияси доирасида касаба уюшмаси Жанубий Кореядаги GM раҳбариятининг истеъфосини талаб қилган, бунга расмий шахслар қандай муносабат билдиргани номаълум. Шуниси маълумки, GM ваколатхонаси раҳбарияти офисга ҳужум ҳолати бўйича полицияга шикоят қилган.
Изоҳ (0)