Европада хавфсизлик ва ҳамкорлик ташкилотининг одам савдосига қарши курашиш бўйича махсус вакили ва координатори Мадина Жарбуссинова бошчилигидаги делегация аъзолари расмий ташриф доирасида Ўзбекистон Республикаси Ички ишлар вазирлигига ташриф буюрди. Бу ҳақда Ўзбекистон Республикаси Ички ишлар вазирлиги матбуот хизмати хабар берди.
Делегация аъзоларини Одам савдосига қарши курашиш бўйича Республика идоралараро комиссияси раиси, Ўзбекистон Республикаси Ички ишлар вазирининг биринчи ўринбосари, генерал-майор Даврон Назармухамедов қабул қилди.
Делегация аъзоларига мамлакат ички ишлар органлари тизимида олиб борилаётган ислоҳотлар ҳақида сўзлаб берилди.
Шунингдек, меҳмонларга республикадаги жиноятчилик ҳолати юзасидан маълумот берилди. Хусусан, Одам савдосига қарши курашиш бўйича Республика идоралараро комиссияси томонидан олиб борилаётган ишлар натижасида 2017 йилда одам савдоси билан боғлиқ мажбурий меҳнатдан фойдаланиш жинояти 39,5 фоизга, жинсий эксплуатация жинояти 81,6 фоизга камайганлиги таъкидланди. Шу ўринда, одам савдоси жиноятини олдини олиш мақсадида, аҳоли ўртасида қатор профилактик тарғибот тадбирлари ўтказиб борилаётгани айтилди.
Учрашув сўнгида Европада хавфсизлик ва ҳамкорлик ташкилоти ҳамда Одам савдосига қарши курашиш бўйича Республика идоралараро комиссияси билан келгусида ҳам ўзаро ҳамкорликни давом эттиришга келишилди.
Изоҳ (0)