30 март куни Ўзбекистон Республикаси Вазирлар Маҳкамасининг 249-сонли «Товар бозорларида монополияга қарши тартибга солишни янада такомиллаштириш чора-тадбирлари тўғрисида»ги қарори қабул қилинди, деб хабар беради рақобат қўмитаси ахборот хизмати.
Ушбу қарор билан товар бозорида сотиладиган товарларни (ишлар, хизматларни) монопол юқори ва монопол паст нархларини аниқлаш тартиби тўғрисидаги низом ва нархлари (тарифлари) давлат томонидан тартибга солинадиган ижтимоий аҳамиятли товарлар (хизматлар) ва уларнинг стратегик турлари рўйхати тасдиқланди.
Қарор Ўзбекистон Президентининг «Ёқилғи-энергетика ресурслари ҳамда бошқа юқори ликвидли маҳсулотлар билан таъминлаш борасида рақобат муҳитини такомиллаштириш, суиистеъмолчиликлар ва талон-тарожликлар шароитини тугатиш, тўлов интизомини мустаҳкамлаш, дебиторлик ва кредиторлик қарзларини камайтириш чора-тадбирлари тўғрисида»ги 2017 йил 14 ноябрдаги ПҚ-3386-сон қарорини ижро этиш, шунингдек, монопол маҳсулотлар рўйхати ва турларини тубдан қисқартириш, монополияга қарши тартибга солишнинг халқаро принципларига ўтишни таъминлаш мақсадида қабул қилинди.
Изоҳ (0)