Тошкентдаги инновацион ярмаркада талаба «Робот фермер» қурилмасини намойиш этди
«Ўзиккиламчиранглиметалл» акциядорлик жамияти томонидан Инновацион ривожланиш вазирлиги, Ёшлар иттифоқи Тошкент шаҳар кенгаши, Artel компанияси ҳамкорлигида уюштирилган ярмаркада республиканинг барча ҳудудидан келган юзлаб ёшлар ўз лойиҳалари билан қатнашди. Бу ҳақда «Халқ сўзи» хабар бермоқда.
— «Робот фермер» Европа мамлакатларида кенг қўлланилади, — дейди шундай лойиҳа муаллифларидан бири, Тошкент давлат техника университети талабаси Турсунпўлат Тиловов. — Ўзбекистонда ҳали бунга қўл урилмагани боис, илк бор ушбу қурилманинг маҳаллий моделини яратдик. У деҳқон бажарадиган қўл меҳнатини автоматлаштирилган тарзда бошқариш имконини беради. Яъни турли ўсимликлар, гуллар ва полиз экинларини экади, парваришлайди. Ернинг намлик миқдорини ҳам ўлчаб, ўз вақтида суғоради. Ҳатто бегона ўтлардан тозалай олади. Буни смартфон орқали масофадан бошқариш имконияти ҳам мавжуд. Ҳозирги кунда мазкур қурилмадан кичик иссиқхоналарда фойдаланиш мумкин. Кэйинчалик унинг катта ер майдонларига мўлжалланган такомиллаштирилган моделини яратиш ниятидамиз.
Ўзбекистон Миллий университети аспиранти Миржалол Қурбоновнинг нефть билан ифлосланган тупроқлар рекултивациясида агробиотехнологияларни қўллаш ғояси ҳам кўпчиликни қизиқтириб қўйди. Унинг айтишича, биологик тозалаш усулига асосланган мазкур инновацион технологияни қишлоқ хўжалиги соҳасида қўллаш натижасида нефть билан ифлосланган тупроқ қопламини 98 фоизгача тозалаш, кимёвий, физикавий ва биологик хоссаларни яхшилаш орқали тупроқ унумдорлигини ошириши мумкин. Қолаверса, унинг иқтисодий самарадорлиги ҳам юқори, яъни ҳар бир гектарига 27 миллион сўмдан ортиқни ташкил этади.
Ярмаркада намойиш этилган инновацион ишланмалар бири-биридан қизиқ ва фойдали. Улар келгусида йирик лойиҳалар туртки берса ажаб эмас.
