Сенаторлар тўй-ҳашамларга оид қарорни ҳозирча қабул қилмади
Ўзбекистон Олий Мажлиси Сенатининг XIV ялпи мажлисида «Тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солиш тўғрисида»ги қарори маъқулланиши кутилаётган эди. ЎзАнинг ёзишича, сенаторлар ушбу қарорни ҳозирча маъқулламаган.
Оилавий маросимларни ихчамлашлаштириш, маъно ва мазмунини қадриятларга мослаштиришга оид ғояни кўпчилик қўллаб-қувватлаётган бўлса-да, бу борада турли баҳс-мунозалар ҳамон давом этмоқда.
Шу боис ушбу масала юзасидан маъруза қилган Сенатнинг фан, таълим, маданият ва спорт масалалари қўмитаси раисининг ўринбосари Гавҳар Алимова Сенат қарорини янада такомиллаштириш, бу борада Республика комиссиясини тузишга оид қўмита таклифини билдирди.
Сенатор ўз чиқишида Тошкент шаҳрида йилига 18—19 минг никоҳ қайд этилиши, лекин уларнинг 20—25 фоизи тўйлардаги ортиқча дабдабалар оқибатида ажримлар билан тугаётгани ачинарли ҳол экани, бу ушбу тизимда туб ислоҳотларга эҳтиёж туғилаётганини айтиб ўтди.
«Оилавий маросимлар билан боғлиқ ишлаб чиқилган Сенат қарори лойиҳасини такомиллаштиришда тегишли вазирлик ва идоралар, жамоат ташкилотлари фаол иштирок этиши, ҳар бир фуқаронинг ушбу масала юзасидан фикрларини эшитиш зарур. Майда-чуйда, бачкана одатларни таг-томири билан йўқотишда барча иштирок этиши, бу борада халқнинг ўзи ташаббускор бўлиши керак», — дейилади хабарда.
