Осиё кубоги-2019 қуръаси: Ўзбекистон нечанчи саватчадан ўрин олади?

Аввалроқ маълум қилинганидек, 2019 йил БААда ўтказиладиган Осиё кубогининг барча иштирокчиси маълум бўлган эди.

Мусобақада илк маротаба 24 та жамоа қатнашади.

Маълумки, жорий йилнинг 4 май куни БААнинг Дубай шаҳрида Осиё Кубогига қуръа ташлаш маросими бўлиб ўтади. Қуръада жамоалар ўша вақтдаги ФИФА рейтингига кўра саватчаларга ажратилади. Футбол мутахассиси Алишер Никимбаевнинг ҳисоб-китобига кўра, Ўзбекистон терма жамоаси янгиланган рейтингда Осиёда 13-ўринда бўлиши кутилмоқда. Бу ҳолатда Ўзбекистон термаси катта эҳтимол билан 3-саватчадан жой олади. Саватчалар қуйидагича кўриниш олиши мумкин:

• 1-саватча: БАА, Эрон, Австралия, Япония, Жанубий Корея, Саудия Арабистони
• 2-саватча: Хитой, Қирғизистон, Сурия, Ливан, Фаластин, Уммон
• 3-саватча: Ўзбекистон, Ироқ, Ҳиндистон, Қатар, Вьетнам, КХДР
• 4-саватча: Филиппин, Баҳрайн, Иордания, Яман, Таиланд, Туркманистон

Қуръага кўра терма жамоалар 6 гуруҳга ажратилади. Гуруҳларда 1 ва 2-ўринни эгаллаган, шунингдек, 3-ўринни эгаллаган жамоалардан энг яхши натижа кўрсатган 4 та жамоа 1/8 финал босқичига йўлланмани қўлга киритади.

Мусобақа 5 январдан 1 февралга қадар БААнинг 4 та шаҳрида бўлиб ўтиши режалаштирилган.