Osiyo kubogi-2019 qur’asi: O‘zbekiston nechanchi savatchadan o‘rin oladi?

Avvalroq ma’lum qilinganidek, 2019-yil BAAda o‘tkaziladigan Osiyo kubogining barcha ishtirokchisi ma’lum bo‘lgan edi.

Musobaqada ilk marotaba 24 ta jamoa qatnashadi.

Ma’lumki, joriy yilning 4-may kuni BAAning Dubay shahrida Osiyo Kubogiga qur’a tashlash marosimi bo‘lib o‘tadi. Qur’ada jamoalar o‘sha vaqtdagi FIFA reytingiga ko‘ra savatchalarga ajratiladi. Futbol mutaxassisi Alisher Nikimbayevning hisob-kitobiga ko‘ra, O‘zbekiston terma jamoasi yangilangan reytingda Osiyoda 13-o‘rinda bo‘lishi kutilmoqda. Bu holatda O‘zbekiston termasi katta ehtimol bilan 3-savatchadan joy oladi. Savatchalar quyidagicha ko‘rinish olishi mumkin:

• 1-savatcha: BAA, Eron, Avstraliya, Yaponiya, Janubiy Koreya, Saudiya Arabistoni
• 2-savatcha: Xitoy, Qirg‘iziston, Suriya, Livan, Falastin, Ummon
• 3-savatcha: O‘zbekiston, Iroq, Hindiston, Qatar, Vyetnam, KXDR
• 4-savatcha: Filippin, Bahrayn, Iordaniya, Yaman, Tailand, Turkmaniston

Qur’aga ko‘ra terma jamoalar 6 guruhga ajratiladi. Guruhlarda 1 va 2-o‘rinni egallagan, shuningdek, 3-o‘rinni egallagan jamoalardan eng yaxshi natija ko‘rsatgan 4 ta jamoa 1/8 final bosqichiga yo‘llanmani qo‘lga kiritadi.

Musobaqa 5-yanvardan 1-fevralga qadar BAAning 4 ta shahrida bo‘lib o‘tishi rejalashtirilgan.