Бугун, 28- март куни Тошкент шаҳри Сергели туманида жойлашган «Ўзиккиламчиранглиметалл» АЖга қарашли «Yoshlar sport city» мажмуасида «Ёшларнинг инновацион ғоялари ва технологияларини қўллаб-қувватлаш ярмаркаси» бўлиб ўтди. Бу ҳақда «Ўзиккиламчиранглиметалл» АЖ матбуот хизмати «Дарё»га хабар бермоқда.
«Байрамона тарзда ўтган мазкур тадбирда республиканинг барча ҳудудларидан келган 100 га яқин ёшлар ўзларининг инновацион ишланмаларини тақдим этди», — дейилади хабарда.
Кўргазма «Ўзиккиламчиранглиметалл» АЖ, Ёшлар иттифоқи Тошкент шаҳар кенгаши, Artel компанияси билан ҳамкорликда ташкил этилди.
Унда Ўзбекистон инновацион ривожланиш вазирлиги, Ўзбекистон Ёшлар иттифоқи ҳамда фанлар академияси вакиллари қатнашди.
Ярмаркани ўтказишдан кўзланган асосий мақсад ёшларнинг илмий тадқиқот ва инновацион фаолиятини ривожлантириш, инновацион технологияларга қизиқиши баланд бўлган ёшларни кашф этиш ва уларнинг янги, рақобатбардош инновацион ғояларини ҳаётга тадбиқ этишга сафарбар этишдан иборат. Кўргазмада ёш олимлар, тадқиқотчилар ҳамда талабалар рағбатлантирилиб, илмий ва амалий ишланмаларни намойиш этиши учун кенг имкониятлар яратилди.
Кўргазма якунига кўра энг яхши инновацион ғоя муаллифларига ҳомийларнинг қимматбаҳо совғалари, диплом ва ташаккурномалар топширилди.
Изоҳ (0)