24 март куни соат 12:21 да Бўка тумани ИИБ тезкор навбатчилик қисмига Бўка тумани марказида жойлашган шох бекатда ёнғин содир бўлганлиги хақида хабар келиб тушган. Бу ҳақда «Дарё»га Тошкент вилоят ИИБ ҳузуридаги Тергов бошқармаси хабар бермоқда.
Қайд этилишича, келиб тушган хабар юзасидан олиб борилган терговга қадар текширув ишлари давомида туман шох бекатида Akfa алюмин профилидан ишланган енгил типдаги дўконда 1964 йилда туғилган Бўка туманида яшовчи аёл тегишли ҳужжатларсиз оғзаки келишув асосида пишириқ тайёрлаб сотиш билан шуғулланиб келаётганлиги маълум бўлган. 24 март куни ҳам аёл пишириқ пишираётган вақтда, ёнғин содир бўлиб, дўкон ичидаги ошхона жиҳозлари ёнган. Тахминан соат 12:29 да дўкон ичида бўлган «пропан» газ баллони ёнғиндан келиб чиққан иссиқлик натижасида чақнаш (портлаш) содир бўлган.
Натижада ёнғин содир бўлган жойга яқин масофада турган беш нафар фуқаро турли даражада тан жароҳати олиб, Бўка тумани марказий касалхонасига ётқизилган.
Мазкур ҳолат юзасидан Бўка тумани ИИБ ҳузуридаги Тергов бўлими томонидан жиноят кодексининг 257-моддаси 1-қисми (техника хавфсизлиги, саноат саниятарияси ёки меҳнатни муҳофаза қилишнинг бошқа қоидаларини шу қоидаларга риоя этилиши учун масъул бўлган шахс томонидан бузилиши) билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)