Кения олимпия терма жамоаси Тошкент орқали Андижонга етиб келди, деб ёзади ЎФА матбуот хизмати. Жамоа 23 март куни Равшан Ҳайдаров устозлик қилаётган ўзбекистонлик олимпиячиларга қарши ўртоқлик ўйинида майдонга тушади.
Рақибнинг Андижонга ташрифи «Наврўз» байрамига тўғри келди ва африкалик футболчилар ўзбекистонликлар билан бирга байрам тантаналарида иштирок этди. Улар аввалига Тошкент халқаро аэропортида, кейинроқ эса Андижонда мухлислар томонидан илиқ кутиб олинган.
Режага кўра, 23 март кунги ўйинга «Баркамол авлод» стадиони мезбонлик қилади. 26 март куни эса Ўзбекистон ва Кения олимпия термалари Фарғонадаги «Истиқлол» стадионида саф тортади.
Аввалроқ водийга ташриф буюрган Умид Аҳмаджонов Осиё чемпионлигини қўлга киритган ўзбекистонлик футболчилар Фарғона ва Андижон шаҳарларида халқаро ўртоқлик ўйинлари ўтказиши ҳақида айтиб ўтганди. Шунингдек, ЎФА биринчи вице-президенти барча футбол мухлисларини Наврўзи айёми билан табриклаб, миллий ва олимпия терма жамоаларининг келгусида кутиб турган ўйинларида омад тилади.
«Наврўз» байрами арафасидаги учрашувлар учун таклифномалар чиқарилган бўлиб, улар футбол мухлисларига бепул тарқатилмоқда.
Изоҳ (0)