Суперлига. Кетма-кет уч ўйинда мағлубиятга учраган «Қизилқум» бош мураббийи истеъфога чиқди

Навоийда Ўзбекистон Суперлигаси 3-тури доирасида «Қизилқум» ва »Насаф» жамоалари ўртасида кечган ва меҳмонлар жамоасининг 2:1 ҳисобидаги ғалабаси билан якунланган ўйиндан сўнг мезбонлар жамоаси бош мураббийи Ҳамиджон Актамов истеъфо берди. Бу ҳақда «Championat.asia» хабар берди.

Актамов ўйиндан кейин ўтказилган матбуот анжумани вақтида истеъфоси ҳақида маълум қилган.

Ўйин бўйича рақибга ютқазмадик, деб ўйлайман. Шунчаки, омадимиз келмади. Биринчи бўлимда, ҳисоб 0:0 пайтида иккита қулай вазият голга айланмади. Яхши ўйнаб ютқаздик. Йигитларга эътирозим йўқ. Бугун бош мураббий сифатида охирги ўйинни ўтказдим. Бу футбол, омад ва омадсизлик ёнма-ён туради. Қўлимдан келганича жамоани юқорига кўтаришга интилдим. Буни тушунган, тушунади. Бир кишига ҳамма ишни бажариш қийинчилик туғдирар экан. Афсуски, ҳозирча чет элдан тажрибали мураббий таклиф этишга имкониятимиз йўқ. Шу боис бундан буён жамоада Юрий Павлович Лукин бош мураббийликни давом эттиради. Илгари ҳеч қачон мавсумни бу қадар ёмон бошламагандик. Аммо ҳар қандай қийинчиликниям охири бўлади. Футболчиларга қўлдан келганча барча имкониятларни яратишга ҳаракат қилаяпмиз. Мавсум энди бошланди. Ўйлайманки, аста-секин яхши натижаларни ҳам қўлга кирита бошлаймиз.

Ҳамиджон Актамов, «Қизилқум» жамоаси собиқ бош мураббийи