Самарқандда трамвайнинг иккинчи тармоғи ишга туширилди

Самарқандда узунлиги 5 километр бўлган иккинчи «Вокзал—Сиёб бозори» трамвай тармоғи фойдаланишга топширилди. Бу ҳақда «Газета.uz» хабар бермоқда.

Линияда 18 та бекат бўлиб, 8 та трамвай вагони 7 дақиқа оралиқда ҳаракатланади. Тармоқни январда ишга тушириш режалаштирилганди.

Самарқандда трамвайлар ҳаракатини йўлга қўйиш ташаббуси ўтган йилнинг апрелида Президент Шавкат Мирзиёев томонидан илгари сурилган эди. Биринчи линиянинг узунлиги 6,4 километр бўлиб, вокзални Сартепа мавзеси билан боғлайди.

Трамвайлар ҳаракати учун 6 та электр станцияси қурилди. Рўдакий ва Гагарин кўчалари чорраҳасида трамвай депоси жойлашган.

Трамвайлар парки 21 машинадан таркиб топган. Келгусида яна 42 та вагон етказиб бериш режалаштирилган. Эндиги навбатда Нарпай кўчасидан Кимёгарлар шаҳарчасига бўлган 8,6 километр масофага темир йўл ётқизиш белгиланган.

Маълумот учун, Самарқандда трамвай тизими 1947 йилдан 1973 йилгача фаолият кўрсатган. 2016 йил майида эса Тошкентда 100 йилдан ортиқ ишлаган трамвай ҳаракати тўхтатилди. Пойтахтдаги вагонлар Самарқандга етказиб берилди.