Ўзбекистон ҳудудидан чиқиб кетиб, қидирувда бўлган шахсларнинг амнистия қўллашга розилик аризалари олиниб, уларга нисбатан эълон қилинган қидирув бекор қилинмоқда. Бу ҳақда Тошкент вилоят ИИБ ҳузуридаги тергов бошқармаси маълум қилди, дея хабар беради ЎзА.
Қайд этилишича, жиноят ишлари бўйича Бекобод шаҳар суди томонидан Жиноят кодексининг 223-моддаси 1-қисмида кўрсатилган жиноятни содир этганлиги учун Сурайё Тулибоевага нисбатан 2012 йил 15 ноябрь куни қидирув эълон қилинган. Ҳозирги вақтда Тожикистоннинг Конибодом шаҳрида яшаётганлиги аниқланиб, ундан Ўзбекистон Олий Мажлиси томонидан 2012 йил 5 декабрь куни чиқарилган «Ўзбекистон Республикаси Конституцияси қабул қилинганлигининг 20 йиллиги муносабати билан амнистия эълон қилиш тўғрисида»ги қарорига асосан розилик аризаси олинган.
Шунингдек, жиноят ишлари бўйича Бекобод шаҳар суди томонидан жиноят кодексининг 211-моддаси 1-қисмида кўрсатилган жиноятни содир этганлиги учун 2013- йил 10 август кунида қидирув эълон қилиниб, Бекобод шаҳар ИИБ томонидан қидирувда бўлган Виталий Сорокин ҳам хозирда Тожикистоннинг Душанбе шаҳрида яшаётганлиги аниқланди.
Ундан Ўзбекистон Республикаси Олий Мажлиси томонидан 2013 йил 12 декабрь куни чиқарилган «Ўзбекистон Республикаси Конституцияси қабул қилинганлигининг 21 йиллиги муносабати билан амнистия эълон қилиш тўғрисида»ги қарорига асосан розилик аризаси олинган.
Ҳар икки айбланувчига нисбатан амнистия қарори татбиқ этилиб, уларга нисбатан эълон қилинган қидирув бекор қилинди.
Изоҳ (0)