Ўзбекистон Ички ишлар вазирининг топшириғига асосан, ички ишлар органлари раҳбарлари бошчилигидаги Тошкент вилоятида ҳудудлардаги секторларда китоб дўконлари фаолияти йўлга қўйилмоқда. Дўконлар илмий-маърифий, бадиий, энциклопедик, болалар ва жаҳон адабиётлари билан таъминланмоқда. Бу ҳақда «Дарё»га Тошкент вилояти ИИБ матбуот хизмати хабар берди.
16 март куни Тошкент вилоятидаги шаҳар ва туманларнинг ИИБ бошлиқлари масъуллигидаги секторларда 18 та замонавий китоб дўконлари ташкил этилди.
Китоб дўконлари очилиши натижасида 12 та тадбиркорлик субъектлари ташкил этилди ҳамда 6 та хўжалик субъектларининг (МЧЖ) филиаллари очилди. Ҳозирда 4 та китоб дўконини таъмирлаш ишлари жадал суръатларда давом этмоқда ва тез кунларда уларнинг фаолияти йўлга қўйилади.
Юқори Чирчиқ туманида «Китоб дунёси» мажмуасининг очилиши муносабати билан ташкил этилган тадбирда вилоят ва туман ҳокимлиги масъуллари, давлат ва жамоат ташкилотлари вакиллари, туман фаоллари ва ёшлар иштирок этди.
ЎзАнинг қайд этишича, китобхонлар дўкондаги «Жаҳон адабиёти дурдоналари», «Ўзбек адабиёти намуналари», «Методик қўлланмалар», «Болажонлар учун эртак китоблар» ва шу каби турли бўлимлардан истаган китобни белгиланган нархда сотиб олиши мумкин.
Тошкент вилоятидаги ИИБ бошлиқлари масъуллигидаги секторларда очилган китоб дўконларида кутубхоналар ҳам ташкил этилган бўлиб, китобхонлар китобни ўқиш учун уни маълум муддатга олиб кетишига рухсат этилади.
Изоҳ (0)