Жиноят ва ҳуқуқбузарликлар профилактикаси куни муносабати билан Ўзбекистон давлат жаҳон тиллари университетида учрашув бўлиб ўтди. Бу ҳақда ЎзА хабар бермоқда.
Тошкент шаҳар жиноят, фуқаролик ишлари бўйича ҳамда маъмурий ва иқтисодий судлар раислари Учтепа тумани аҳолиси ҳамда талаба-ёшлар билан учрашди.
Учрашувда фуқароларнинг ҳуқуқ ва манфаатларини ишончли ҳимоя қилиш долзарб вазифа эканига эътибор қаратилди. Бунинг учун судларга, ваколатли давлат органларига мурожаат қилиш учун барча зарур шарт-шароитлар яратилган.
Аҳоли билан очиқ мулоқотлар ташкил этилаётгани уларнинг муаммоларини ўрганиш, вақтида ёрдам кўрсатишда муҳим омил бўлмоқда.
Учрашув давомида фуқаролар томонидан тушган 15 мурожаат жойида ҳал этилди. Айрим шикоятларга ўрганиб чиқиш асносида жавоб бериладиган бўлди. Фуқаролардан тушган таклифлар ёзиб олинди.
— Аҳоли билан тўғридан-тўғри мулоқот қилиш, уларнинг дарди ва таклифларини тинглаш, муаммоларини қонун доирасида адолатли ҳал этиш мақсадида бизда сайёр судлар бўйича режа-жадвал белгиланган, — дейди Жиноят ишлари бўйича Тошкент шаҳар Учтепа туман суди судьяси Алишер Жалилов. — Ҳар 10 кунда Тошкент шаҳри туманларида сайёр суд ва учрашувлар олиб борилмоқда. Жиноят ишлари бўйича Тошкент шаҳар суди томонидан жорий йилнинг ўтган даврида 50 га яқин жиноят иши сайёр суд мажлисларида кўриб чиқилди.
Изоҳ (0)