Британиялик физика олими Стивен Хокинг 77 ёшида вафот этди, деб ёзади The Guardian. Бу маълумотни олимнинг оиласи тасдиқлаган.
«Отамиз бугун (14 март) оламдан ўтганидан чуқур қайғудамиз», — деди Хокингнинг фарзандлари Люси, Роберт ва Тим.
Хокинг 1988 йилнинг апрелида «Вақтнинг қисқача тарихи» илмий-оммабоп китоби чоп этилгач, машҳур бўлиб кетган эди. Китоб ўнлаб тилларга таржима қилинган ва 10 миллионта нусхада нашр этилган.
Олим 22 ёшдалигида, 1963 йили унга «ёнбош амиотрофик склерози» ташхиси қўйилган. Ўшанда шифокорлар унинг бор-йўғи 2—3 йил яшашини башорат қилганди. Аммо у узоқ йиллар нафақат илм-фан билан машғул бўлди, балки икки марта уйланиб, уч фарзанднинг отаси бўлишга ҳам улгурди.
Стивен Хокинг бутунлай фалаж бўлиб қолганига қарамай, фаол турмуш кечирарди, компьютер нутқ синтезатори орқали дарс ўтарди, нутқ сўзларди, дунё аҳли билан мулоқотда бўларди.
Изоҳ (0)