Япония бош вазири апрелда АҚШга ташриф буюриб, Трамп билан КХДР муаммосини муҳокама қилади

Япония бош вазири Синдзо Абэ апрелда АҚШга ташриф буюриб, президент Дональд Трамп билан музокаралар ўтказади, деб ёзади «ТАСС».

«Президент Трамп билан телефон орқали суҳбатлашдик. Апрелда мен АҚШга ташриф билан бораман, у ерда президент билан Шимолий Корея муаммосини муҳокама қилишни истардим», — деди у.

Япония ҳукумати раҳбари «ядросизланишга тайёрлигини намойиш қилган» КХДРнинг гапларидаги ўзгаришларни баҳолади. «Бу халқаро ҳамжамият Пхеньянга ўтказган босим натижаси бўлди», — деди Абэ.

Япония бош вазири КХДР ядросизланиш бўйича муайян чораларни кўрмагунича, Пхеньянга максимал босимни сақлаб қолиш зарурлигини айтди. «Бу борада Япония ва АҚШ позицияларида ўзгаришлар йўқ, ва бу позицияда биз президент билан бир ёқадан бош чиқардик», — деди Абэ.

Эслатиб ўтамиз, КХДР етакчиси Ким Чен Ин Жанубий Корея делегацияси орқали АҚШ президенти Дональд Трампга яқин вақтлар ичида учрашув ўтказишни таклиф қилди. Трамп ушбу учрашувни шу йилнинг майигача ўтказишга тайёрлигини маълум қилди.