Лорд Муҳаммад Илтаф Шайх: Улуғбек ҳаёт бўлганида ўзбеклар биринчи бўлиб ойга сафар қиларди

Олдинроқ хабар қилинганидек, Ўзбекистоннинг етакчи исломшунос ва шарқшунос олимларидан иборат делегация Буюк Британияга сафар қилиб, илмий доиралар, таълим ва маданият муассасалари вакиллари, зиёлилар, диний соҳа намояндалари билан учрашув ва музокаралар ўтказмоқда. Бу ҳақда ЎзА хабар берди.

Ўзбекистоннинг Буюк Британиядаги элчихонасида бўлиб ўтган тадбирда йирик сиёсат арбоби, Лордлар палатаси вакили лорд Муҳаммад Илтаф Шайх бошчилигида «Кўҳна қитъа»даги нақшбандийлик тариқати вакиллари, уламолар, туристик компаниялар мутасаддилари қатнашди. Учрашувда Ўзбекистонда диний-маърифий соҳада рўй бераётган ижобий ўзгаришлар, зиёрат туризмини қўллаб-қувватлаш ва ривожлантириш бўйича кўрилаётган чора-тадбирлар, хусусан, ҳалол стандартининг жорий этилгани, табаррук манзилларда сайёҳлар учун яратилаётган қулай шароитлар хусусида маълумот берилди. «Ўзбекистон – ислом маданияти жавоҳири» мавзусидаги тақдимот ва фильм намойиши бўлиб ўтди.

Лорд Муҳаммад Илтаф Шайх Ўзбекистонда ижтимоий-иқтисодий, маданий-маърифий йўналишлардаги ислоҳотлар мамлакат халқаро нуфузининг янада юксалишига, турли соҳаларда Ўзбекистоннинг дўстлари ва ишончли ҳамкорлари сони ортишига хизмат қилаётганини қайд этди.

«Ўзбекистон ислом маданияти, фани ривожига улкан ҳисса қўшган. Агар Мирзо Улуғбек ҳозир ҳаёт бўлганида ўзбеклар биринчи бўлиб ойга сафар қилган бўларди. Ал-Хоразмийсиз замонавий технологиялар бўлмас эди. Жаҳон ҳамон тиббиётни Ибн Сино асарлари асосида ўрганмоқда. Биз радикаллашувга Ўзбекистон маданияти воситаси билан қарши курашишимиз керак. Сизлар Имом Бухорий ҳадисларини инглиз тилига таржима қилиб, шарҳлаб беринг. Биз бу китоблар билан жаҳолатга қарши курашамиз», — деди лорд.

Учрашув қатнашчиларининг фикрича, Ўзбекистон Президенти ташаббуси билан ўтказилажак етти пирга бағишланган халқаро семинар ва конференциялар шуниси билан ҳам аҳамиятлики, нақшбандия таълимоти уламолари, тадқиқотчиларини бир ерга жамлаш ва улар ўртасида доимий мулоқот ва ҳамкорликни йўлга қўйиш имконини беради. Бу эса илгари кузатилмаган ҳодисадир.

Шунингдек, учрашувда Буюк Британиядаги зиёрат туризми билан шуғулланувчи компания вакиллари қатнашиб, Ўзбекистонга махсус саёҳатларни ташкил этиш ҳақида мулоқот қилди.

Ўзбекистон делегациясининг Буюк Британияга сафари давом этмоқда.