Жанубий Кореянинг Samsung компанияси 25 февраль, якшанба куни янги Galaxy S9 ва Galaxy S9+ смартфонларини тақдим этди, деб ёзади «РИА Новости». Тақдимот Барселонадаги Халқаро мобил конгрессда бўлиб ўтди.
Гаджетлар дизайни флагманларнинг аввалги авлодидан орқа панелдаги элементлар вертикаль тарзда жойлашгани билан фарқ қилади, холос. Бармоқ изи сканери камера модули остида жойлашган, бу эса объективнинг ифлосланиши муаммосини ҳал қилади.
S9 ва S9+ нинг «чексиз» дисплейи диагонали тегишли равишда 5,8 ва 6,2 дюймга тенг (Quad HD+ 1440×2880 пикселли). Тезкор хотираси 4/6 Гб, доимий хотираси — 64 Гб (+ microSD).
Кичик модель 12 мегапикселли камера, каттаси эса худди шундай мегапикселли қўш камера билан жиҳозланди. Бундан ташқари, фойдаланувчилар ўз селфиможиларини яратиши мумкин.
Қурилмаларда биометрик аутентификациянинг уч хил услуби бор: кўзнинг рангдор пардаси орқали, бармоқ изи орқали ёки юзни таниб олиш функцияси орқали. Уларда, шунингдек, Dedicated Fingerprint функцияси мавжуд, у смартфонни блокдан чиқариш учун битта бармоқ изидан, ҳимояланган пaпкани очиш учун бошқа бир бармоқ изидан фойдаланиш имконини беради.
Смартфонларга биринчи марта SmartThings дастури ўрнатилди, у гаджетлар ёрдамида «ақлли» уйдаги «уланган» маиший техника ва қурилмаларни бошқариш имкониятини беради.
Янги моделларга Qualcomm Snapdragon 845 (Шимолий Америка, Япония ва Хитойда) ва Samsung Exynos (Европада) чиплари ўрнатилди.
Флагманлар расман 19 мартда сотувга чиқади. Россияда Galaxy S9 59,99 минг рубль (1070 доллар), Galaxy S9+ эса 66,99 рубль (1200 доллар)дан сотилади.
Изоҳ (0)