Шавкат Мирзиёев: Бутун дунё мусулмонлари Бухорога интилади

Ўзбекистон Президенти Шавкат Мирзиёев 16—17 февраль кунлари ташриф билан Бухорода бўлди. Аввал хабар берилганидек, вилоятга ташриф Баҳоуддин Нақшбанд мажмуаси зиёратидан бошланган эди.

ЎзАнинг хабар беришича, Президент мажмуада олиб борилган ишлар билан яқиндан танишиб, масъул шахсларга қилиниши лозим бўлган ишлар юзасидан тегишли кўрсатмалар берди.

Ўзбекистон тарихидан келиб чиқиб айтадиган бўлсак, Бухорои шариф — илм макони. Бутун дунё мўмин-мусулмонлари Бухорога интилади. Нима учун? Бу ердаги илм, бу ердаги тарих, бу ердаги заковатга.

Шавкат Мирзиёев, Ўзбекистон Президенти

Президент Шавкат Мирзиёев томонидан 2017 йил 11 июль куни «Абдухолиқ Ғиждувоний таваллудининг 915 йиллигини ва Баҳоуддин Нақшбанд таваллудининг 700 йиллигини нишонлашга тайёргарлик кўриш ҳамда уни ўтказиш тўғрисида»ги фармойиш қабул қилинган эди. Президент Шавкат Мирзиёев мазкур тадбирларни юқори савияда ўтказиш, бунинг учун барча манбалардан фойдаланиш лозимлигини таъкидлади.

Бу замин — улуғ замин. Қанча вақтимиз кетса ҳам, керак бўлса, моддий-маънавий бойликларимизни ишга солиб, Бухоро замини, Бухоро халқининг дунё тараққиётига қўшган ҳиссаси ҳақида ёзиб, буни дунё ҳамжамиятига, ўз навбатида, ўз халқимизга, ёшларга, нуронийларга етказадиган, бор кучимизни ишга солиб, баралла тараннум қиладиган вақт келди.

Нақшбанд, Ғиждувонийнинг катта байрамларини муносиб ўтказишнинг ҳамма чора-тадбирларини кўришимиз, буни мусулмон дунёси, уммасига билдиришимиз керак. Тайёргарликни ҳам шошилмай, босиқлик билан, вазминлик билан қилиш керак. Қачон тайёр бўлсак, шунда ўтказишимиз керак. Бу масалага енгил-елпи қарамаслик керак. Маъно-мазмунини яна бир марта чуқур ўйлаб кўриб, шундай ўтказишимиз керакки, элимиз маънавий озуқа, билим олсин.

Мана шу тантанамизга жуда катта тайёргарлик қилайлик, китобларини чиқарайлик, илмий асосланган конференциялар ўтказайлик. Америкадан, Европага бориб, сизлар шуни тараннум қилиб келинглар. Бу тадбирлар сўнгги бир йилда биз соф исломнинг ривожи учун илгари сурган ташаббусларимизнинг давоми бўлиши керак.

Шавкат Мирзиёев, Ўзбекистон Президенти

Президент, шунингдек, «Етти пир» номи билан машҳур қадамжоларни ободонлаштириш лойиҳалари билан ҳам танишган эди. Баҳоуддин Нақшбанд, Абдулхолиқ Ғиждувоний, Ориф Ревгарий, Ромитаний, Бобойи Самосий каби меъморий мажмуаларни ўз ичига олган етти пир зиёратгоҳи ўртасидаги умумий масофа 122 километрни ташкил қилади. Шавкат Мирзиёев мажмуалар ўртасидаги йўллар бўйида замонавий инфратузилма ташкил қилиш бўйича кўрсатма берган.

Етти пирнинг орасидаги йўллар бўйларида улар ҳақидаги маълумотлар акс этсин. Зиёратга келганлар кенг маълумотга эга бўлсин.

Шавкат Мирзиёев, Ўзбекистон Президенти