2017 йилда энг кам ўртача иш ҳақи Наманган вилоятида қайд этилди

2017 йилда энг кам ўртача иш ҳақи республика ҳудудлари орасида Наманган вилоятида қайд этилган. Бу ҳақда ЎзА хабар бермоқда.

Давлат статистика қўмитаси маълумотларига кўра, ўтган йилда вилоятда ўртача ҳисобланган ойлик иш ҳақи 1 миллион 140 минг сўмни ташкил этган.

Шунингдек, Самарқанд ва Сурхондарё вилоятларидаги ойликлар миқдори ҳам республикадаги ўртача иш ҳақидан 20 фоиз кам бўлган.

Ўртача ойлик иш ҳақининг юқори миқдори Тошкент шаҳрида 1 миллион 986 минг сўмни (республикадаги ўртача ойлик иш ҳақига нисбатан 136,7 фоиз), Навоий вилоятида 1 миллион 926 минг сўмни (132,6 %) ва Тошкент вилоятида 1 миллион 559 минг сўмни (107,3 %) ташкил этган.

Маълумот учун, Меҳнат Кодексига мувофиқ, муайян давр учун белгиланган меҳнат нормасини ва меҳнат вазифаларини тўлиқ бажарган ходимнинг ойлик меҳнат ҳақи қонун ҳужжатларида Меҳнатга ҳақ тўлаш ягона тариф сеткасининг биринчи разряди (2017 йил январь декабрь ойларида 354,3 минг сўмни ташкил этган) бўйича белгиланган миқдордан оз бўлиши мумкин эмаслиги кўрсатиб ўтилган.

Олдинроқ Ўзбекистонда 2017 йилда ўртача ойлик иш ҳақи 12,3 фоизга ўсгани хабар қилинган эди.