Россия тергов қўмитасининг ходимлари 11 февраль куни Подмосковьеда ҳалокатга учраган Ан-148 самолёти бўйича тергов ишларини олиб бормоқда. Параметрик ва овоз ёзиш қурилмаларда қайд этилган маълумотларга кўра, ўз дисплейларида турлича тезлик кўрсаткичига дуч келган учувчилар ҳаво кемаси ерга қулаб тушгунига қадар ўзаро жанжаллашган, деб хабар берди «Коммерсант».
Қаттиқ шикаст етган «қора қути»ни қайта тиклашдан сўнг маълум бўлдики, ундаги маълумотлар жуда қисқа. Аввалига «Домодедово» аэропортидан учиш вақтида учувчилар назорат харитасини ўқиган, турли механизм ва қурилмаларнинг ишлашини текширган. Шу билан бирга, тезлик датчикларидаги маълумотларни ўқийдиган приёмниклар иситгичини ишга тушириш харитада белгиланган бўлса-да, уни ёқишмайди. Парвоз амалга оширилганидан кўп ўтмай туриб учувчилар қуриламалардаги тезлик кўрсаткичлари жуда паст эканлигини пайқаб қолади. Ўзаро жанжаллашган ҳолда улар тезликни ошириб, самолётни ерга оғдириш орқали муаммони ҳал этишга ҳаракат қилади.
Маълумотларга кўра, учувчилар муаммо нимада эканлигини барибир тушуна олмаган.
Давлатлараро авиация қўмитасининг экспертларини хулосасига кўра, иситгичнинг ишга туширилмаслиги фюзеляждаги учта приёмникнинг музлаб қолишига олиб келган ва натижада учувчилар дисплейидаги тезлик ҳақида нотўғри маълумотларни кўрсатган. Самолёт 2 минг метр баландликда бўлганида, учувчилардан бирининг индикаторида тезлик соатига 200 километрни кўрсатган бўлса, иккинчисида умуман нолга тенг бўлган. Аслида эса ҳаво кемаси соатига 600 километрда ҳаракатланган. Экипаж керакли тезликка эришиш учун кескин пасайишни амалга оширган ва ерга қулаган.
Эслатиб ўтамиз, «Саратов авиалиниялари» компаниясининг Москвадан Орскка йўл олган Ан-148 йўловчи самолёти пойтахт вилоятида ҳалокатга учради. Ҳаво кемаси бортида 71 киши — 65 йўловчи ва 6 нафар экипаж аъзоси бўлган.
Изоҳ (0)