Ўзбекистон Президенти Шавкат Мирзиёев 9 февраль куни Тошкентда амалга оширилаётган бунёдкор билан ишлари танишиш жараёнида «Юнусобод» метро йўлининг 2-навбати қурилишини кўздан кечирди ва шу ерда шаҳар жамоат транспорти фаолияти бўйича ўз фикрларини билдириб ўтди. Бу ҳақда «Ўзбекистон 24» телеканалининг «Ахборот 24» дастурида маълум қилинди.
Ҳамма қилаётган ҳаракатларимиз иложи борича тезроқ одамлар учун шароит яратишга қаратилган. Биринчидан, метро хавфсиз транспорт, иккинчидан, арзон ва қулай.Энг катта масала — логистика, буни чуқурроқ ўйлаш керак. Автобус ва метро логистикаси шундай ақлли бўлсинки, буни одамлар сезсин. Одамлар сезиши учун эса бир кун эмас, ҳар куни ишлаш керак. Ҳар куни мониторинг қилиш керак — қаерда тирбандлик бор, қаерда одамлар кўпроқ норози бўляпти, қайси бекатларда қай вақт одам кўп, тирбандлик қаерда, қачон пайдо бўляпти, унинг логистикаси қандай? Мана шу масалаларни ҳам ўйлаш керак.
Ҳозир ҳар куни дронлар, вертолётларни учириб, йўловчилар оқимини таҳлил қилиш керак. Бир чоракда бир марта йўналишларга аниқлик киритилиши керак. Нимага? Талабдан келиб чиқиб. Ягона мақсад — одамларга шароит яратиш. Ёз вақти бошқа, қиш вақти бошқа, таътил вақти бошқача талаб. Ҳаёт ҳар куни ўзгариб боряпти.
Янги қурилаётган метро билан мавжуд метрополитеннинг ҳамкорлиги, ҳамнафаслиги, логистикаси қанчалик тўғри эканлигини бирорта одам аниқ айтиб беролмайди. Буни айтишнинг имкони йўқ. Ҳаёт ўзгаряпти. Талаб ўзгаряпти. Одамларнинг маънавияти ўзгаряпти. Метро билан автобус — бизнинг ҳар кунлик контингентимиздир.
Шавкат Мирзиёев, Ўзбекистон Президенти
Изоҳ (0)