Ўзбекистон Республикаси Ташқи савдо вазирлиги мамлакат ҳудуди орқали транзит ўтказиш тартибини соддалаштириш, ишончли транспорт-транзит коридорларини яратиш ва транзит ташиш оқимини кўпайтиришга қаратилган Ўзбекистон Республикаси Президентининг қарори лойиҳасини ишлаб чиқди. Бу ҳақда вазирлик расмий сайтида маълумот берилди.
Ушбу ҳужжат Ўзбекистон Республикаси Вазирлар Маҳкамаси томонидан бериладиган Ўзбекистон Республикаси божхона ҳудуди орқали спиртли ичимликлар ва тамаки маҳсулотларини транзит қилиш учун рухсат олиш тартибини бекор қилишни назарда тутади. Бундан ташқари, ташувчига Ўзбекистон Республикаси божхона органларининг депозит ҳисоб варағига тегишли божхона тўловлари (бож, аксиз солиғи, ҚҚС)ни амалга ошириш, маҳсулот Ўзбекистон Республикаси ҳудудидан чиқиб кетганидан сўнг пул қайтариш мажбуриятлари ҳам бекор қилинади.
Мазкур тартиб Ўзбекистон Республикаси Президентининг 2007 йил 4 октябрдаги ПҚ-703-сонли «Акциз солиғига тортиладиган айрим турдаги товарларнинг Ўзбекистон Республикаси ҳудуди орқали транзит йўли билан олиб ўтилишини янада тартибга солиш чора-тадбирлари тўғрисида»ги қарори асосида алкоголь ва тамаки маҳсулотларини автомобиль ёки темир йўл орқали олиб ўтиш учун қўйилган.
Юқорида кўрсатилган ҳужжат қабул қилинганидан сўнг, 2007 йилдан бошлаб Ўзбекистон Республикаси ҳудудида алкоголь ва тамаки маҳсулотларини транзит қилиш деярли амалга оширилмади.
Бу тартибнинг бекор қилиниши Ўзбекистон Республикаси ҳудуди орқали транзит қилиш тартибини сезиларли даражада соддалаштиради ва транспорт орқали транзит ҳажми янада кўпайиши кутилмоқда.
Изоҳ (0)