2017 йил 23 ноябрь куни соат 21:05 да Бектемир туманида Бектемир йўл-патруль хизмати томонидан олиб борилаётган тезкор тадбир чоғида Тошкент вилоятидан пойтахтга кириб келаётган фуқаро Мурод Ўртаевнинг ёнидан марихуана гиёҳвандлик моддаси топилган, деб хабар беради ЎзА.
Фуқаро буни таниши Илҳом Исоқовдан олганини айтгач, бу иш бўйича чуқурлаштирилган барча чора-тадбирлар кўрилди.
Жиноят ишлари бўйича Тошкент шаҳар Бектемир тумани судида фуқаролар Мурод Ўртаев ва Илҳом Исоқовнинг гиёҳвандлик моддаларини етиштириш, етказиб бериш ва истеъмол қилишга оид жиноят иши кўриб чиқилди.
Суд томонидан уларнинг қилмишини ўзи тўла англамаган ҳолда содир этгани, муқаддам судланмагани, чин кўнгилдан пушаймонлиги, оилавий аҳволи, содир этган жиноятининг ёмон асоратларини тўла англамагани инобатга олинди. Уларга қўйилган айбловлар таҳлил этилиб, фуқаролар озодликка чиқарилди.
Мурод Ўртаев Ўзбекистон Республикаси Жиноят кодексининг 276-моддаси (Гиёҳвандлик воситалари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 1-қисмида кўрсатилган жиноятни содир этганликда айбдор деб топилиб, унга шу моддага асосан иш ҳақининг 10 фоизини давлат даромади ҳисобига ушлаб қолган ҳолда бир йил ахлоқ тузатиш иши жазоси тайинланди.
Илҳом Исоқов эса Ўзбекистон Республикаси Жиноят кодексининг 273-моддаси (Гиёҳвандлик воситалари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 2-қисми, 25 ҳамда 273-модданинг 5-қисмида назарда тутилган жиноятларни содир этганликда айбдор, деб топилди. Шу боис унга нисбатан қўлланилган «қамоққа олиш» тарзидаги эҳтиёт чораси ўзгартирилиб, жазони очиқликда ўташи қатъий тушунтирилиб, суд залидан озод этилди.
«Ашёвий далил сифатида икки фуқародан олинган 4,63 грамм ва 115 грамм марихуана гиёҳвандлик моддалари йўқ қилинди», — дейилади хабарда.
Изоҳ (0)