Бухорода фуқароларга уй қуриб беришни ваъда қилиб уларнинг катта миқдордаги пулларини ўзлаштирган фирибгар қўлга олинди, деб хабар беради Бухоро вилояти ИИБ матбуот хизмати.
«Бухоро шаҳар Ширбудин кўчаси 6-муюлиш 5-уйда яшовчи нафақадаги Муслима Негматова Ўзбекистон Республикаси Президентининг виртуал қабулхонасига мурожаат қилиб Навоий вилояти Қизилтепа тумани Айрончи қишлоғида яшовчи «Архитектор-Ҳамкор» хусусий корхонаси раҳбари 1986 йилда туғилган Аслиддин Эгамов ишончини суиистеъмол қилиб, уй қуриб беришни ваъда қилиб, 40 000 000 сўм пулларини қўлга киритиб ҳозирга қадар қайтариб бермасдан келаётганлигини баён қилган», — дейилади хабарда.
Мурожаат юзасидан олиб борилган суриштирув ишлари давомида аниқланишича, «Архитектор-Ҳамкор» хусусий корхонаси раҳбари А.Эгамов Муслима Негматова сингари кўплаб фуқароларни алдаб, уларнинг катта миқдордаги пулларини қўлга киритиб, ўз манфаатлари учун сарфлаб юборганлиги аниқланган.
Жумладан, А.Эгамов ўзининг жиноий ҳаракатларини такроран давом эттириб, Бухоро шаҳар Мустақиллик кўчаси 72/1-уй 82-хонада яшовчи Бахтиёр Худойбердиевга уй-жой қуриб беришини айтиб, унинг 41 431 000 сўм пулини олган.
Бундан ташқари, А.Эгамов Ромитан тумани Ф.Хўжаев кўчаси 32-уй, 10-хонада яшовчи Анвар Азимовга ҳам худди шундай ваъдалар бериб унинг 182 540 000 сўмлик пул маблағларини фирибгарлик йўли билан қўлга киритганлиги аниқланган.
Мазкур ҳолат юзасидан А.Эгамовга нисбатан Ўзбекистон Республикаси Жиноят Кодексининг 168-моддаси (Фирибгарлик) 3-қисми «а» банди билан жиноят иши қўзғатилиб, ҳозирги кунда тергов ҳаракатлари олиб борилмоқда.
Изоҳ (0)