Ақтўбедаги фожиа оқибатида қурбон бўлган 52 ўзбекистонликдан иккиси Тошкентда истиқомат қиларди. Шу муносабат билан уларнинг оила аъзоларига таъзия билдириш учун бош имом-хатиблар ҳар икки хонадонда бўлди, дея хабар бермоқда Ўзбекистон мусулмонлари идорасининг Тошкент шаҳар вакиллиги.
Тошкент шаҳар бош имом-хатиби ўринбосари Эргаш Рустамов ва Сергели тумани бош имом-хатиби Нўъмон Ҳамидов Сергели тумани Қурувчилар мавзесида яшаган, 23 ёшда бўлган Муҳиддинжон Умаржонов хонадонига, Олмазор тумани бош имом-хатиби Садриддин Абдурашидов бошчилигида жамоат вакиллари эса туманнинг Ҳикмат Раҳмонов кўчасида истиқомат қилган, 37 ёшда бўлган Хуршидхон Турсунов хонадонига ташриф буюрди.
Хабар беришларича, имом-хатиблар машъум фожиада ҳалок бўлган ўғлонлар ҳақларига Қуръон тиловати ўқиб, дуолар қилган. Фожиа қурбонларининг ота-оналари, яқинлари билан суҳбатда бўлиб, уларга муфтийнинг ҳамдардлигини етказган. Шунингдек, уларга моддий-маънавий кўмак — пул маблағлари, озиқ-овқат маҳсулотлари улашиб, руҳий тасалли берилган.
«Динимизда бирор фожиа билан вафот этган мўминнинг даражаси юқори бўлиши, Пайғамбаримиз соллаллоҳу алайҳи ва саллам ҳадисларининг бирида киши сувга ғарқ бўлиб, ўтда куйиб, том остида қолиб, аёл киши тулғоқ пайтида вафот этса, шаҳидлик мақомини топишини айтиб, мусибат эгаларига тасалли бердилар», — дейилади вакиллик ахборотида.
Изоҳ (0)