Ўзбекистон Фавқулодда вазиятлар вазирлиги сайтидаги «Вазирга савол» бўлими орқали келиб тушган мурожаатлар бўйича тегишли чоралар кўрилмоқда. Бу ҳақда 27 январь куни вазирлик матбуот хизмати хабар берди.
Хабар беришларича, 26 январь куни Тошкент шаҳрида яшовчи Ш.Миркомилов сайт орқали вазирга мурожаат қилиб, «аниқ яшаш жойига эга эмас шахс кўчада ухлаётгани, совуқ кунлар ўтгунига қадар унга амалий ёрдам кўрсатиш»ни сўраган.
Вазирнинг топшириғига кўра, Тошкент шаҳар Фавқулодда вазиятлар бошқармасининг Қутқарув гуруҳи кўрсатилган манзил — Миробод тумани, Катта Миробод 2-тор кўчасига юборилган.
Қутқарув гуруҳи кўрсатилган манзилда ташқарида ухлаётган, аниқ яшаш жойи бўлмаган, 1952 йилда туғилган фуқаро Александр Юсуповга биринчи ёрдам кўрсатиб, уни Миробод тумани ИИБ профилактика инспектори билан биргаликда яқин тиббиёт бирлашмасига жойлаштирган.
Бундан ташқари, шаҳарнинг Шайхонтоҳур туманида, «Бунёдкор» метро бекати яқинида ухлаётган, аниқ яшаш жойи бўлмаган, 1946 йилда туғилган фуқаро Анатолий Сандруновга биринчи ёрдам кўрсатган ҳамда тегишли чоралар кўриш учун уни Шайхонтоҳур туманидаги ички ишлар ходимига топширган.
Изоҳ (0)