Сиз ҳали ҳам қорағат (черника)ни кўп ейиш натижасида узоқни яхши кўролмаслик «тузалиб кетади» деб ҳисоблайсизми? Бугун биз сиз билан бирга шу ва шунга ўхшаш нотўғри фикрлар ҳақида гаплашмоқчимиз.
1-уйдирма. Кўзойнак кўриш қобилиятини ёмонлаштиради. Яхшиси, кўзойнак тақмаслик керак, чунки у туфайли узоқни яхши кўролмаслик кучайиб кетади
─ Агар узоқни яхши кўролмайдиган одам кўзойнак тақмаса, унинг кўзлари ҳар доим зўриқиш ҳолатида бўлади. Доимий равишда кўз мушакларига тушадиган бундай оғирлик кўз чарчоқлари, бош ва қош усти суяклари оғриқларини келтириб чиқариши, кейинчалик эса кўриш қобилиятининг янада ёмонлашишига олиб келиши мумкин.
Тегишли муолажалар ҳақида профессионал тавсиялар берадиган яхши мутахассисга ўз вақтида мурожаат қилиш жуда муҳим. Сифатли линзали кўзойнаклар эса кўзларга тушадиган зўриқишни бартараф қилишга ва кўриш қобилиятининг саломатлигини сақлашга ёрдам беради.
2-уйдирма. Черника кўриш қобилиятини ҳимоя қилади. Агар черника есангиз, ҳеч қачон кўриш қобилияти билан боғлиқ муаммо бўлмайди
─ Черника ҳақиқатан ҳам кўзлар учун фойдали. Унинг таркибидаги витаминлар ва антоцианлар туфайли, бу резавор мевани мунтазам равишда истеъмол қилиш кўзнинг тўр парда томирларига ижобий таъсир кўрсатади. Лекин черника сизни узоқдан яхши кўролмасликдан ҳимоя қилишига, касалликни даволашига ёки кўриш қобилиятини тиклашига умид қилиш керак эмас.
3-уйдирма. Компьютерда ишлаш кўзлар учун жуда зарарли ва ҳеч қандай ҳимоя ёки машқлар ёрдам бермайди
─ Электрон сиёҳли китоблардан бошқа, рақамли экранлар зўр бериб спектрнинг кўзга кўринадиган қисқа тўлқинли қисмига тегишли бўлган кўк-бинафша ёруғлик нурларини тарқатади.
Кўк-бинафша ёруғликнинг узоқ муддатли таъсири кўпчиликка таниш бўлган кўз чарчоқлари: ноаниқ кўриш, кўзларда қуруқлик ва санчиқлар сезиш, қовоқларда оғирликни ва қош усти суякларида оғриқларни ҳис қилиш аломатларини келтириб чиқаради.
Лекин, агар бу сизнинг экран ёнида ўтириб ишлашингиз билан боғлиқ бўлса, компьютердан бутунлай воз кечиш ва ишдан бўшашингиз кераклигини билдирмайди.
Гаджетлар билан ишлаш вақтида кўзларни ҳимоя қилиш учун кўк-бинафша ёруғликни ўтказмайдиган линзали кўзойнак тақиш тавсия қилинади. Кун давомида вақти-вақти билан электрон мосламадан ташқари бошқа ишлар билан шуғулланиш ва кўзларни дам олдиришга ёрдам берувчи оддий машқларни бажариш керак: кўзларни соат стрелкаси бўйича айлантириш, навбат билан чапга, ўнгга, юқорига ва пастга қараш.
Манба: «Zdorovie.com»
Изоҳ (0)