ЎФФ президенти Умид Аҳмаджонов «Реал Мадрид» футбол академияси директори Хулио Ронко билан учрашиш учун Испания пойтахтига жўнаб кетди.
Сафардан кўзланган асосий мақсад — Ўзбекистонда болалар футболини ривожлантириш масалаларини муҳокама қилиш ва албатта, «Қироллик клуби»га қарашли академия филиалини Тошкентда очиш масаласини ҳал қилишдан иборат бўлади.
Болалар футболини ривожлантиришда Ўзбекистон футбол федерацияси мамлакат ҳудудини тўрт қисмга бўлиш масаласини ўртага қўйганди. Унга кўра, ҳар бир ҳудудга хорижий мутахассислар жавобгар бўлиши керак. Уларни бирлаштириб турувчи қисмга эса катта эҳтимол билан бельгиялик мутахассислар жавоб беради.
Мадридга ташрифи давомида Умид Аҳмаджонов Испания футбол федерацияси раҳбарияти билан ҳам кўришади. Шунингдек, Ла Лиганинг 20-туридан ўрин олган «Реал» — «Депортиво» учрашувини «Сантьяго Бернабеу» аренасининг президентлар ложасидан кузатиб боради.
Режага кўра, 23 январь куни Умид Аҳмаджонов Франция футбол федерацияси раҳбарияти билан кўришади ва фикрлар алмашади.
Изоҳ (0)