Олий Мажлис Қонунчилик палатасида Қонунчилик муаммолари ва парламент тадқиқотлари институти фаолияти тақдимоти бўлиб ўтди. Бу ҳақда ЎзА хабар бермоқда.
Тадбирда иштирок этган сенаторлар, депутатлар, сиёсий партиялар, мамлакатда фаолият юритаётган дипломатик корпус, халқаро ташкилотлар вакиллари ҳамда журналистларга мазкур институтнинг асосий вазифалари, тузилмаси, устувор йўналишлари ва режалари ҳақида маълумот берилди.
Институтда 37 штат бирлиги жорий этилиб, 7 бўлим фаолияти йўлга қўйилган. Улар турли соҳалар бўйича қонунларни такомиллаштириш борасида иш олиб боради. Институт Олий Мажлисга келаётган турли таклифларни чуқур таҳлил қиладиган илмий марказ вазифасини бажаради.
Олий Мажлис ҳузурида ташкил этилган Қонунчилик муаммолари ва парламент тадқиқотлари институти яқин вақт ичида тадбиркорлик, савдо ва экология соҳасидаги қонун ҳужжатларини кодификация қилиш бўйича аниқ таклифларни ишлаб чиқиш, қонунлар ижросини таъминлаш билан боғлиқ фуқаролар, тадбиркорлик ва иқтисодиётнинг ортиқча бюрократик харажатларини бартараф этишнинг истиқболли йўлларини топиш, жиноий ва жиноий-процессуал қонунчиликни ишлаб чиқиш концепциясини яратишни режалаштирмоқда.
Иқтисодиёт соҳасида амалдаги қонунларни инвентаризация қилиш ва унинг натижаларига кўра, тахминан 10 та янги қонун лойиҳасини тайёрлаш белгиланган. Жумладан, «Валютани тартибга солиш тўғрисида»ги Ўзбекистон Республикаси Қонунининг янги таҳрири тайёрланади.
2018 йилда институт Европа парламенти тадқиқотлари маркази, АҚШ, Германия, Туркия, Жанубий Корея парламентларининг илмий муассасалари билан ҳамкорлик меморандумлари имзолашни режалаштирган.
Эслатиб ўтамиз, олдинроқ депутат Раҳимжон Ҳакимов мазкур институт директори этиб тайинлангани маълум қилинганди.
Изоҳ (0)