Одамлар сунъий арчаларни бир нечта сабабларга кўра сотиб олади: ёғоч чангига бўлган аллергия, йиғиштириш осонлиги, ёнғин хавфсизлиги учун. Лекин ҳақиқатан ҳам сунъий арчалар хавфсиз ва зарарсизми?
Бу саволга жавоб бериш учун сунъий арча нимадан қилинганини аниқлаш керак. Кўпинча сунъий арчалар поливинилхлорид (ПВХ) деб аталувчи одатдаги синтетик пластикдан ясалади. Шунингдек улар қувурлар, болалар ўйинчоқлари, тиббий асбоблар ва автомашиналарнинг ички пардозларини ишлаб чиқаришда ишлатилади.
Кўпчилик экспертларнинг таъкидлашича ПВХ — иссиқликка чидамли модда бўлиб, унга қўрғошин, қалай ва барий металлари барқарорлаштирувчи сифатида ишлатилиши мумкин. 2004 йилда ўтказилган тадқиқот натижаларидан сунъий арчаларда юқори миқдорда қўрғошин борлиги маълум бўлди.
Бундан ташқари, ПВX дан чиқувчи, учар органик моддалар сифатида танилган газлар кўз, ўпка ва бурун шиллиқ қаватини безовта қилиши мумкин.
Баъзан ПВX таркибига эндокрин тизимини бузиш хусусияти билан машҳур бўлган фталатлар қўшилиши мумкин.
Бу ерда асосий муаммо шундаки, сиз сунъий арчангизнинг айнан нимадан қилинганини ҳеч қачон билмайсиз. Бунинг устига унга қўшилган моддаларнинг баъзилари одам организмига таъсири бўйича лаборатория текширувларидан ўтказилмаган бўлиши ҳам мумкин.
Лекин бундан ўзингизни ҳимоя қилишингиз мумкин. ПВXдан қилинган буюмлар ҳаво билан бўлган биринчи контактда ўзидан катта миқдордаги зарарли газларни чиқаради, шунинг учун сунъий арча сотиб олганингиздан кейин уни бир неча кун ташқарида шамоллатинг. У очиқ ҳавода қанча узоқроқ турса, сизга шунча камроқ зарар етказади.
Ва уни бир умрга сақламанг — ПВX эскириши билан яна зарарли моддалар чиқара бошлайди. Сунъий арчаларни ҳар 9 йилда бир марта алмаштириш лозим.
Манба: »Zdorovie.com»
Изоҳ (0)