Наманганда фирибгарликка оид ишлар бўйича суд амалиёти ҳамда фирибгарлик жиноятининг олдини олиш самарадорлигини ошириш масалаларига бағишланган семинар бўлиб ўтди. Бу ҳақда ЎзА хабар бермоқда.
Семинарда мамлакатда фирибгарлик жиноятининг ўсиш тенденцияси кузатилаётгани билдирилди. Масалан, 2014 йилда фирибгарлик жинояти билан боғлиқ 3752 иш кўрилган бўлса, 2016 йилда бу кўрсаткич 9 мингдан ошиб кетган.
Шунингдек, мулкка тажовуз қилиш билан боғлиқ ҳуқуқбузарликлар орасида ўзганинг мулкини фирибгарлик йўли билан талон-тарож қилишга оид жиноятлар ортиб бораётгани қайд этилди.
Наманган вилоятида ўтган йилда 800 дан зиёд фирибгарлик жинояти содир этилган ва 689 таси бўйича жиноий иш кўрилган.
«Наманган шаҳрининг ўзида 19 маҳаллада фирибгарлик жинояти ортгани ташвишланарлидир. Жиноят ишлари маҳаллаларда кенг жамоатчилик иштирокида кўриб чиқилаётгани, сайёр судлар яхши самара беряпти», — дейди шаҳардаги «Саноат» маҳалла фуқаролар йиғини раиси Н.Садриддинов.
Семинар иштирокчиларига фирибгарлик жиноятининг иқтисодиёт соҳасидаги қатор жиноятлар, жумладан, ўзганинг мулкини талон-тарож қилишнинг бошқа шаклларидан фарқли жиҳатлари хусусида батафсил тушунча берилди, дейилади хабарда.
Изоҳ (0)