Қашқадарё вилоятида 2017 йилда «Маҳалла» хайрия жамоат фонди томонидан 2 958 нафар ижтимоий ҳимояга муҳтож, кам таъминланган, ногирон, якка ёлғиз қария ва Икки Жаҳон уруши қатнашчиларига 1,48 миллиард сўмлик моддий ёрдам пуллари кўрсатилди. Бу ҳақда Фуқароларнинг ўзини ўзи бошқариш органлари фаолиятини мувофиқлаштириш бўйича Қашқадарё вилоят кенгаши «Дарё»га маълум қилди.
Вилоят кенгаши бошқаруви раиси Дусмурот Султановнинг сўзларига кўра, 398 нафар имконияти чекланган шахсларга 161,9 миллион сўмлик сўмлик моддий ёрдам кўрсатилган бўлиб, уларнинг 15 нафари олий таълим муассасаларининг талабалари эди (уларга кўрсатилган ёрдам ҳажми қарийб 42 миллион сўмни ташкил этган).
Бундан ташқари, 61 нафар якка ёлғиз кексаларга 19,5 миллион сўмлик, 58 нафар уруш ва меҳнат фахрийларига 23,5 миллион сўмлик, 903 нафар кам таъминланган оила фарзандларига 152,2 миллион сўмлик, табиий офатдан жабр кўрган 259 нафар шахсга 13,9 миллион сўмлик, 147 нафар чин етим болаларга 126,2 миллион сўмлик моддий ёрдам кўрсатилган.
Ногирон ва меҳнатга лаёқатсиз 82 фуқаронинг уй-жойларини таъмирлаш учун 900 миллион сўм ажратилган, ижтимоий ҳимояга муҳтож, кам таъминланган 48 оилага 40,4 миллион сўмлик духовкалар, 100 нафар ногиронга эса 92 миллион сўмлик ногиронлик аравачалари олиб берилган.
Изоҳ (0)