Ўзбекистон футбол федерацияси президенти Умид Аҳмаджонов жами беш нафар спортчини футболдан умрбод четлаштирди. Бу ҳақда ЎФФ матбуот хизмати маълумот берди.
Ўзбекистон ўсмирлар ва ёшлар термаларидаги ўйинлари билан танилган Абдумутал Абдуллаев бир умр футболсиз қоладиган бўлди. У 2008 йил U16 ҳамда 2011 йил U19 Осиё Чемпионатида Ўзбекистон шарафини ҳимоя қилган. Бунда унинг 1992 йил 19 сентябрда дунёга келгани кўрсатилган.
Аслида эса футболчининг ҳақиқий исм-шарифи Нодир Тешабоев бўлиб, у 1989 йилнинг 4 октябрь куни туғилган бўлган ва буни футбол жамоатчилигидан яширишга ҳаракат қилган.
Ўзбекистон ўсмирлар терма жамоаси сафида 2010 йилги қитъа чемпионатида тўп сурган Муҳаммаджон Абдуллаевнинг ҳам шахси аниқланди. Тошкент мезбонлик қилган турнирга у 1994 йилда туғилган деб рўйхатга олинган. Ҳақиқий исми Расулжон Абдуллаев бўлган футболчи эса аслида 1991 йилнинг 23 ноябрида туғилганди, дейилади ЎФФ хабарида. У сўнгги вақтларда «Хотира—79» сафида тўп суриб келаётганди.
Энди эса оммага Улуғбек Давлатов бўлиб танилган йигит билан танишинг. У кўрсатилгани каби 1996 йилда туғилмаган. Ҳақиқий исми Нуриддин Ҳасанов бўлган футболчи 1994 йилнинг 20 июль куни дунёга келган. Ёшини кичиклаштириш орқали 2012 йилги Осиё Чемпионатида ўйнаган, бир йил ўтиб ўсмирлар ўртасидаги Жаҳон Чемпионатига бориб келган. «Сурхон» сафида ўйнаб келаётган бу футболчига ҳам энди миллионлар ўйинида жой йўқ.
2012 йилги Осиё Чемпионатида Дилшод Нуралиев бошқарувидаги жамоа чемпионликни қўлга киритганди. Бу жамоада Давлатовдан ташқари Зокир Аҳмадалиев каби «ўқланган» футболчи ҳам бўлган. Асл исми Дилшод Аҳмадалиев бўлган футболчи аслида 1994 йилда туғилган, бироқ ҳаммани 1996 йилман деб ишонтирган.
Шунингдек, Бурхон Ҳасанов отлиқ «Бухоро» клубининг ёшларида ўйнайдиган футболчи айтилгани каби 2000 йил эмас, балки 1998 йил таваллуд топган бўлиб чиққан.
ЎФФ доимий равишда футболдаги ғирромликлар, ёш кичрайтиришлар ва ҳужжатларни қалбакилаштириш билан боғлиқ ҳолатларга қарши кураш олиб боради. Шубҳали кўринган ҳар бир футболчини шахсан ўзим текшираман. Агар қонунбузарликлар аниқланса, қатъий жазоланади. Ғирром футбол бизга керак эмас.Ўз ёшини кичрайтириб, чет элда тўп суриб юрган футболчилар ҳақида ҳам менда барча маълумот бор. Тез орада улар ҳам маълум қилинади ва тегишли чоралар кўрилади.
Шунингдек, футболчиларни чет давлатларга сотиш бўйича қоидабузарликка йўл қўйган, катта пул ишлаш мақсадида, футболчини ғирромлик кўчасига етаклаган футбол агентлари ҳақида маълумотлар тўпланди. Улар ҳам тез орада федерация расмий сайтида эълон қилинади ва тегишли жазолар тайинланади.
Умид Аҳмаджонов, ЎФФ президенти
Аввалроқ Умид Аҳмаджонов ҳужжатларни қалбакилаштириш билан шуғулланган футболчилар ишини Адлия вазирлиги ўрганиб чиқишни бошлагани ҳақида айтиб ўтганди. Кўп ўтмай, илк «қалдирғочлар» ушланди ҳамда футболдан умрбод кетказилди. ЎФФдаги ишончли манбанинг «Дарё»га маълум қилишича, тез орада кўпчиликни ҳайрон қолдирадиган яна бир хабар эълон қилинади.
Изоҳ (0)