«Газета.ru» нашри Ғарб сиёсатчилари қишки таътилни қаерда ўтказаётгани ҳақида маълумот тўплаб тақдим этди.
Дональд Трамп
АҚШ президенти Рождество ва Янги йилни Палм-Бич курорт шаҳридаги (Флорида штати) ўзининг Мар-а-Лаго қароргоҳида кутиб олди. У ерда қор йўқ, албатта, бироқ байрамни мароқли ўтказишга ёрдам берадиган бошқа йўллар бисёр. Дональд Трамп таътил вақтида Жастин Томас ва Даниэл Бергер каби профессионал гольфчилар билан яшил майдон устида бир неча бор беллашишга улгурди.
Ҳамма ҳам қишки таътилни Мар-а-Лагода нишонлай олмайди. Трамп клубининг Янги йил оқшомида фақатгина унга аъзолар ва таклиф этилган меҳмонлар иштирок этиши мумкин. Улар учун кириш чиптаси тегишли равишда 600 ва 750 доллар. Мар-а-Лагога аъзо бўлиш учун эса, дастлабки бадални — 200 минг доллар ва ҳар йили 15 минг доллардан тўлаш лозим.
Ангела Меркель
Германия канцлери Ангела Меркель қишки таътилни ўтказиш учун турмуш ўртоғи билан Швейцариянинг Альп тоғларига йўл олди. Меркель оддий чанғида учиш ва фаол ҳордиқни маъқул кўради. Унинг тоғ чанғиларини ишлаб чиқарувчи севимли бренди (Гермина) ҳам бор бўлиб, канцлер 20 йилдан бери унга «хиёнат» қилган эмас.
Ўтган йили Меркель қишки таътил вақтида йиқилиб тушиб, тос суягини синдириб олганди. Шундан сўнг Гермина компанияси унга бир жуфт янги чанғиларни юборган, бироқ канцлер совғани қабул қилишни истамаган эди.
Елизавета II
Британия қироллик оиласи ҳам Рождествони ўзига хос усулда нишонлайди. Ўтган йилгидек Елизавета II турмуш ўртоғи Филипп билан Сандрингемга — Норфолкдаги қасрга йўл олди. У қиролича Елизаветанинг шахсий мулки ҳисобланади.
Елизавета II ҳар сафар Рождествони Сандрингемда нишонлайди. Биргаликда нонушта қилиш ва совға алмашиш учун қироллик оиласининг барча аъзолари тўпланади. Шундан сўнг улар муқаддас Мария Магдалина черковига ташриф буюради.
Эммануэль Макрон
Франция президенти Эммануэль Макрон Рождество ва Янги йилни француз вазирларининг кайфиятини бузишдан бошлади. Мамлакат раҳбари уларга қишки таътил вақтида узоққа кетиб қолмасликни, шунингдек, байрам вақтида телефонларини ўчириб қўймасликни буюрди.
Рождество арафасида Макрон ўзининг 40 ёшга тўлганини ҳам нишонламоқда. Байрам оқшоми Елисей саройида бўлиб ўтди. Шундан сўнг президент рафиқаси Брижит билан мамлакат шимолидаги Ле Туке шаҳрига йўл олди.
Жастин Трюдо
Канада бош вазири Жастин Трюдо жорий йилдаги қишки таътилни ўтган йили шов-шувлар домида қолганлиги сабаб оддийроқ нишонлашга қарор қилди. Ўтган Рождествода Трюдо оиласи билан Багамадаги ороллардан бирида нишонлаган эди.
Жорий йилда бош вазир Оттава яқинидаги тоғ ёнбарғларида жойлашган ўзининг расмий қароргоҳига йўл олди. У ерда Трюдо Рождество ва Янги йилни ўз оиласи даврасида кутиб олди.
Изоҳ (0)