Назорат органлари фаолиятини мувофиқлаштирувчи Республика кенгаши қарорлари билан Назорат қилувчи органлар томонидан якка тартибдаги тадбиркорлар ва хўжалик юритувчи субъектлар — юридик шахслар фаолиятидаги текширишларни мувофиқлаштириш ва ўтказиш тартиби тўғрисидаги низомларга қўшимчалар киритилди, деб ёзади Norma.
Ҳужжатга мувофиқ, ваколатли органларнинг амалга ошириш учун Республика кенгаши ёки вилоят комиссияларидан қўшимча розилик олиш талаб қилинмайдиган назорат функциялари рўйхати кенгайтирилди.
Энди якка тартибдаги тадбиркорлар ва хўжалик юритувчи субъектлар — юридик шахслар томонидан дарёлар ўзанларини тозалаш ва қирғоқларини мустаҳкамлаш, норуда фойдали қазилмаларни қазиб олиш ишлари устидан назорат мувофиқлаштиришсиз олиб борилади. Амалга ошириладиган ишлар Ўзбекистон Республикаси Президентининг 2017 йил 25 сентябрдаги ПҚ-3286-сон «Сув объектларини муҳофаза қилиш тизимини янада такомиллаштириш чора-тадбирлари тўғрисида»ги қарори талабларига мувофиқ бўлиши керак.
Назорат функциясини Ўзбекистон Республикаси Экология ва атроф-муҳитни муҳофаза қилиш давлат қўмитаси, Қишлоқ ва сув хўжалиги вазирлиги, Давлат геология ва минерал ресурслар қўмитаси, «Саноатгеоконтехназорат» давлат инспекцияси, Қорақалпоғистон Республикаси Вазирлар Кенгаши, вилоятлар, туманлар ва шаҳарлар ҳокимликлари бажаради.
Изоҳ (0)