O‘zbekiston Prezidenti Shavkat Mirziyoyev 20-noyabr kuni ish haqi, pensiyalar, stipendiyalar va nafaqalar miqdorini oshirish to‘g‘risidagi farmonni imzoladi. Farmon matni “Xalq so‘zi”da e’lon qilindi.

Foto: “Gazeta.uz”

Farmonga muvofiq, respublika aholisining daromadlari va turmush darajasini yanada muttasil oshirib borish, fuqarolarga ijtimoiy madadni kuchaytirish maqsadida 2017-yilning 1-dekabridan boshlab budjet muassasalari va tashkilotlari xodimlarining ish haqi, pensiyalar, stipendiyalar hamda nafaqalar miqdori o‘rta hisobda 15 foizga oshiriladi.

Shunday qilib, 2017-yilning 1-dekabridan boshlab O‘zbekiston hududida eng kam:

  • ish haqi — oyiga 172 240 so‘m (hozir — 149 775 so‘m);
  • yoshga doir pensiyalar — oyiga 336 880 so‘m (hozir — 292 940 so‘m);
  • bolalikdan nogironlarga beriladigan nafaqa — oyiga 336 880 so‘m (hozir — 292 940 so‘m);
  • zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan nafaqa — oyiga 206 720 so‘m (hozir — 179 755 so‘m)

miqdorida belgilanadi.

O‘zbekistonda eng kam ish haqi miqdori so‘nggi bor 2016-yil oktabrida oshirilgan edi.