Ўзбекистон ва Беларусь 2020 йилга келиб товар айланмасини 500 миллион долларга етказишни режалаштирмоқда. Бу ҳақда Беларусь бош вазирининг ўринбосари Михаил Русий маълум қилди, деб хабар берди 1News.
«2017 йил 9 ойи якуни бўйича ўзаро товар айланмаси ҳажми 100 миллион доллардан ошди. Бу ўтган йилнинг шу даврига нисбатан юқори кўрсаткич. Олдимизда жиддий вазифа турибди — 2020 йилга келиб 500 миллион доллар товар айланмасини таъминлаш. Биз учинчи давлатлар бозорларида биргаликда ишлашимиз лозим», — деди Русий.
Ўзбекистон бош вазири ўринбосари Нодир Отажонов мазкур вазифани амалга ошириш учун икки томон тиғиз ишлаши ва қўшма лойиҳаларни амалга оширишини қайд этди.
Минскда Ўзбекистон ва Беларусь ҳукуматлараро комиссиясининг 5-йиғилиши бўлиб ўтмоқда. Томонлар қишлоқ хўжалиги, қурилиш, соғлиқни сақлаш, енгил ва озиқ-овқат саноати соҳасида, минтақалар ва икки давлат ишбилармон доиралари ўртасида ҳамкорликни чуқурлаштиришга асосий эътибор қаратди.
Изоҳ (0)