Шавкат Мирзиёев Нукус шаҳридаги собиқ «Нукус Реммаш» масъулияти чекланган жамиятига қарашли бино ва иншоотларни реконструкция қилиш ва қўшимча бинолар қуриш ҳисобига барпо этилган Samsung заводига борди, деб хабар берди ЎзА.
Ҳозирда ушбу заводда телевизорнинг тўрт ва чангютгичнинг ўн уч тури ишлаб чиқарилмоқда.
Ўзбекистон Президенти заводнинг ишлаб чиқариш жараёнини кўздан кечирди. Маҳсулотлар сифати ва кўлами билан қизиқди.
«Бугун мамлакатимизда маиший техника воситалари ишлаб чиқариш ҳажми ошди. Аҳолининг бу борадаги талаби қондирилмоқда. Энди бу соҳада экспорт ҳажмини оширадиган вақт келди», — деди Шавкат Мирзиёев.
Давлат раҳбари заводда ишлаб чиқарилаётган маҳсулотлар турини янада кўпайтириш бўйича топшириқлар берди.
Ўзбекистон Президенти ташаббуси билан жорий йилда Қорақалпоғистон Республикасида қатор йирик лойиҳалар амалга оширилди. Биргина «Ўзэлтехсаноат» АК томонидан умумий қиймати 27,5 миллиард сўмлик 12 лойиҳа ҳаётга татбиқ қилинди.
Шавкат Мирзиёевга «Ўзэлтехсаноат» АК томонидан келгусида Қорақалпоғистон Республикасида амалга оширилиши режалаштирилган лойиҳалар тақдим қилинди. Лойиҳаларда ярим автомат кир ювиш машиналари, электр шкафлар ва сув иситиш мосламалари, иситиш мосламалари ва радиаторлар, энергиятежамкор лампалар, маиший техника воситаларини сотиш ва техник хизмат кўрсатиш йўналишлари бўйича маълумотлар ўрин олган.
Изоҳ (0)