Глобал иқлим исиши оқибатида Арктикадаги музликлар сўнгги 1500 йил ичидагига қараганда тезроқ эримоқда. Бу ҳақда АҚШнинг Океанлар ва атмосферани тадқиқ қилиш миллий бошқармаси томонидан маълум қилинди, деб ёзмоқда «ТАСС».
Тадқиқот муаллифларидан бирининг айтишича, айни пайтда Арктикада инсоният тарихидаги қиёслаб бўлмайдиган жараён юз бермоқда. Унинг фикрича, бу ўзгаришлар одамлар ҳаётида қандай акс этишини тушуниш учун ҳозироқ юз бераётган жараёнларни кузатишни кучайтириш керак.
Бошқарманинг ҳисоботида қайд этилишича, 2017 йилда Арктика музликларнинг майдони 1981—2010 йиллардагига қараганда 25 фоизга камроқ. Муз қатламининг қалинлиги камаймоқда. Арктикадаги ўртача ҳарорат 2016 йилнинг октябрь ойидан 2017 йилнинг сентябрь ойигача бўлган вақт оралиғида одатдагидан Цельсий шкаласи бўйича 1,6 даража юқори бўлган. Шимолий Муз океанидаги сувнинг ҳарорати ҳам кўтарилган. Чукотка денгизида ҳаво ҳарорати 1980—2010 йиллардаги ўртача кўрсаткичга қараганда тўрт даража кўтарилган.
Тадқиқотчилар Арктикада сув ва ҳавонинг исиши атмосфера оқимлари ҳаракатининг ўзгаришига олиб келишидан ва дунёнинг турли нуқталарида табиат ҳодисаларининг юзага келишидан огоҳлантирмоқда. Арктика музларининг эриши ўсимлик ва ҳайвонот дунёсининг ҳаётида ўз аксини топади. Бир нечта давлат дарҳол Арктикадаги нефть ва газ захиралари учун рақобат курашига киришади.
Изоҳ (0)