10 декабрь куни Тошкент шаҳридаги Инҳа университетида бўлиб ўтган «Дастурлаш соати» глобал акциясида 5 ёшдан 13 ёшгача бўлан 200 нафар болалар қатнашди. Бу ҳақда университет матбуот хизмати хабар бермоқда.
4 декабрдан 10 декабргача дунёнинг 180 дан ортиқ мамлакатларида «Дастурлаш соати» акцияси бўлиб ўтди.
Бу йил мазкур акция Ўзбекистонда илк маротаба ташкил этилди. Лойиҳа Тошкент шаҳридаги Инҳа университети томонидан ўтказилиб, уни Microsoft корпорацияси, БМТТД ва CodeCraft лойиҳаси қўллаб-қувватлади.
Университети талабалари машҳур Minecraft ўйинига асосланган Heroʼs Journey («Қаҳрамон йўли») ни дастурлашни ўрганиш учун учта дарс сессиясини ўтказди.
Microsoft корпорацияси муҳандислари болажонларга информатика асосларини осон ва тушунарли тилда ўрганиши учун мазкур дастурни тайёрлади. Ундан дарс вақтида, синф соати ва уй вазифаларини бажаришда фойдаланиш мумкин.
Акциянинг барча иштирокчилари бир соат давомида Heroʼs Journey’нинг бир қанча даражаларини босиб ўтди ҳамда танлов якунларига кўра сертификат, шунингдек, Minecraft ўйини қаҳрамонлари акс этган махсус стикерларни қўлга киритди.
Изоҳ (0)