Даниялик эркак зараркунанда қундузларга қарши судда ютқазди

Данияда қундузлар томонидан етказилган моддий зарарни қоплатиш мақсадида шикоят қилган эркак судда ютқазди. Бу ҳақда «РИА Новости» хабар бермоқда.

Ғарбий Ютландия вилоятида истиқомат қилувчи Финд Андерсен-Фрюдал қундузлар у эгалик қиладиган ердаги дарахтлар ва кўлга зиён етказгани устидан Дания табиатни муҳофаза қилиш агентлигини судга берган эди.

Ер эгаси агентликдан 200 мингдан 300 минг Дания кронаси (37—40 минг евро)гача бўлган миқдорда товон пули тўлаб берилишини талаб қилган эди.

Бироқ Холстебро шаҳри суди Финднинг даъвосини рад этиб, агентликка унинг суд харажатларини қоплаш учун 30 минг крона (4 минг евро) миқдорида пул тўлаш мажбуриятини юклади.

Суд қарорида таъкидланишича, агентлик фуқарога етказилган зарар ўрнини қоплаб берган. Бундан ташқари, мулкка зарар етказган қундузлар, экспертлардан бири таъкидлаганидек, ноёб турга мансуб ва экотизим барқарорлигига ижобий таъсир кўрсатади.

ТВ2 телеканалига берган интервьюсида Финд «суд қароридан ҳафсаласи пир бўлганини, бироқ бу қарордан ҳайрон қолмагани»ни маълум қилган. «Бизда бюрократлар ҳаддан ташқари кўп ва менга ўхшаган одамлар уларнинг айтганини қилишга мажбур», — деди даъвогар.

Финд суд қарори устидан юқори турувчи инстанцияга апелляция бериш ниятида.